കോല്ക്കത്ത: ഓണറേറിയം വര്ധിപ്പിക്കല് ഉള്പ്പെടെയുള്ള വിവിധ ആവശ്യങ്ങള് ഉന്നയിച്ച് ഇന്നലെ പശ്ചിമബംഗാള് ആരോഗ്യ വകുപ്പ് ആസ്ഥാനത്തേക്ക് ആശാ തൊഴിലാളികള് നടത്തിയ മാര്ച്ച് കോല്ക്കത്ത നഗരത്തെ സ്തംഭിപ്പിച്ചു.
മാസങ്ങളായി ശമ്പളം ലഭിക്കുന്നില്ലെന്നും തുച്ഛമായ തുക മാത്രമാണ് ലഭിക്കുന്നതെന്നും ആരോഗ്യ പ്രവര്ത്തകര് പറഞ്ഞു. മാര്ച്ച് പോലീസ് തടഞ്ഞതിനെത്തുടര്ന്ന് കോല്ക്കത്തയിലെ എസ്പ്ലനേഡിലും സാള്ട്ട് ലേക്കിലും ആയിരക്കണക്കിന് ആശാ തൊഴിലാളികള് പ്രധാന പാതകള് ഉപരോധിച്ചു.
വിവിധ ജില്ലകളില്നിന്നെത്തിയ പ്രതിഷേധക്കാരെ ഇന്നലെ രാവിലെ മുതല് സീല്ദ, ഹൗറ റെയില്വേ സ്റ്റേഷനുകളില്നിന്നു പുറത്തിറങ്ങിയപ്പോള് പോലീസ് തടഞ്ഞു. നിരവധി സ്ഥലങ്ങളില് പോലീസ് പ്രതിഷേധക്കാരെ തടഞ്ഞത് നേരിയ സംഘര്ഷത്തിനു കാരണമായി.
ആരോഗ്യവകുപ്പ് ആസ്ഥാനമായ ‘സ്വാസ്ഥ്യ ഭവന്’ സ്ഥിതി ചെയ്യുന്ന സാള്ട്ട് ലേക്കിലേക്കു ചില പ്രതിഷേധക്കാര് ബാരിക്കേഡുകള് ചാടിക്കടക്കാന് ശ്രമിച്ചു. സാള്ട്ട് ലേക്കിലെ ചില ഭാഗങ്ങളില് വാഹന ഗതാഗതം രണ്ടു മണിക്കൂറിലധികം തടസപ്പെട്ടു.
ഓണറേറിയം പ്രതിമാസം 5,500 രൂപയില്നിന്ന് 15,000 രൂപയാക്കണമെന്നും അഞ്ചു ലക്ഷം രൂപയുടെ ഇന്ഷ്വറന്സ് നല്കണമെന്നുമാണ് ആശാ വര്ക്കര്മാരുടെ പ്രധാന ആവശ്യം.
E-paper LOGIN
LOGIN
